आ च्यार दिनां री चमक-चानणी, फेर अंधारी रातां ।

डावड़ी, करलै मीठी बातां !

आ च्यार दिनां री चमक-चानणी, फेर अंधारी रातां ।
रूं-रूं में थारै जबर जवानी, देर न लागै जातां ॥
डावड़ी, करलै मीठी बातां !

क्यांनैं गतब करै जोबन रो, थिर नहीं थारै हाथां ।
थिर न जवानी रंग-रूप है, क्यूं गरबीजै पातां ॥
डावड़ी, करलै मीठी बातां !

ओ माटी में काल मिलैला, रुकै न रोक्यां जागां ।
भला करम करलै ए डावड़ी, ओ ही चालसी साथां ॥
डावड़ी, करलै मीठी बातां !

ओढ्यां। पैरियां फिरै एकेली, जीव न लागै जागां ।
मन रो पंछी फिरै डोलतो, भटकै बागां-बागां ॥
डावड़ी, करलै मीठी बातां !

गोरड़ी क्यूं करै मिजाज, प्रेम सूं करलै मीठी बातां ।
धन जोबन माटी मिल ज्यासी, रोक्यो रुकै न जातां ॥
डावड़ी, करलै मीठी बातां !

एक आसरो लेय गुरु रो, पकड़ उणां नैं बाथां ।
केवल साजन कहै, सुण बावळी, गावो गुरु री गाथा ॥
डावड़ी, करलै मीठी बातां !

----------------------------------------------------------

म्हारौ गाम सबसूं न्यारौ, न्यारी ईंरी बातां।
सुखी मिनखां रा दिन कटै, ऊजळी कटै रातां।।

कच्ची गळियां कच्चा मकान, कच्ची बां’री छातङी।
पक्को लो’रौ गेट लगागे, कच्ची राखी भींतङी।।

ठाण तूङी भर्‌या पङ्या, नीरै भर्‌यौ बोरो।
घी दूध रा टोकण भर्‌या, मोकळा खावो छोरो।।

छाबै मे’ली रोटङी, थाळी घाल्यौ भात।
मार पालथी जीमै ‘, के तो बां’री बात।।

ऊंचो टिब्बो कोरी रेत, हाळी मांडी झूंपङी।
दे हलकारा चीङी उडावै, भाजै डरगे लूंकङी।।

बाजरै गी रोटी सागै, खावै काचर गी सब्जी।
पेट साफ रेवै निरोगो, करै दूर आ कब्जी।।

बाजरी गो आटो लेगै, बणाऔ खाटै री राबङी।
खाओ मजै सूं पेट भरगे, मुंह दुखै ना जाबङी।।

चुल्है रोटी पोवै माऊ, छोरौ खेलै पास।
मार्‌यौ मुंह परात में, धोळी होगी नास।।

मुंडेरां बैठ्यो कागलो, बोलै मीठी बाणी।
पीव म्हारा परदेस बसै, बोली लागै खाणी।